被視為英冠奪標熱門之一雷丁近期頻頻失分，不過亨格比利相信佢會知恥近乎勇，自己地頭殺敗鬧兵荒高雲地利，今晚呢場英冠獨腳戲宜押主W，另可補多注入球「大」！（廣東體育周二凌晨4:00直播）
雷丁前仗輸畀修咸頓可謂羞家到爆，但上仗造訪卡迪夫城踢得唔曳，成個下半場十人應戰都和到二比二，證明班球員鬥志極佳。呢場波領紅安達比基，今晚要坐波監，不過杜比利傷愈復出可頂替其位置，防線實力依然唔曳。
高雲地利傷兵滿營
相反高雲地利就濕滯囉，除防守中場塔比之外，史堤芬胡禮同奧斯保尼都加入埋十字軍行列，領隊高文今晚要搵司職中堅賀爾客串右閘，撞正今季表現大勇雷丁左翼史堤夫亨特肯定有排忙。
況且雷丁係主場「入球王」，奇雲杜里同路爾亨特今季馬捷斯基球場包辦十六個入波，睇怕高雲地利都頂唔住。考慮到高雲地利領隊高文偏好四三三陣式，首席射手摩利臣亦連續三場作客賽事有「士哥」，今晚出現大手交易機會相當高。