意大利盃十六強今晚爆發激戰，由AC米蘭聖西路恭候拉素。兩個月前雙方意甲交手AC大勝四比一，如今再度碰頭AC想重溫美夢難過登天，事關「紅黑兵團」近況回落，加上「肥安」鍾意用副選兵踢意盃，戰意點計都唔及拉素好，「讓球客勝」有1.9倍玩得過！（無翡翠台周四凌晨3:45直播）
AC早排戰績起飛，一度打出連續十場不敗佳績，但睇真查實「紅黑兵團」近期表現下滑得幾緊要，對住包艇基爾禾僅憑一個十二碼險勝，面對拖連奴亦遭逼和，上場聯賽仲大敗畀巴勒莫，表現跌晒Watt，憑乜讓拉素先？
雖然卡卡刑滿復出，不過AC除加度素同波里路之外，就連前鋒柏圖都加入埋十字軍行列，加上佢老人家眾多，馬甸尼同施多夫周日踢足全場，恩沙基亦都搏成粒鐘，AC家陣要分身應付歐協盃同聯賽兩條戰線，相信主帥安察洛堤亦會好似往年一樣，安排一班副選兵落場。
彭迪夫傷愈可披甲
拉素近況唔叻得AC幾多，對上三場聯賽仲失晒分，不過會長洛迪圖已經向練迪里奧羅斯派定心丸，講明成班高層都對佢有信心，難得高層咁關照，迪里奧羅斯仲唔趁機會做番齣好戲咩！
況且拉素方面冇乜新傷兵，射手彭迪夫已經傷愈，今戰可以候命。而球隊上一圈淘汰阿特蘭大一戰，主力包括列迪斯馬、莫路沙拉迪同布洛治都悉數披甲，證明唔使兼顧歐洲賽拉素都幾重視呢個盃仔。加上緊周末又要大戰國米，迪里奧羅斯當然想今場意盃威番鋪壯一壯聲威啦！