今屆東南亞錦標賽有兩大魚腩，老撾同柬埔寨排名較低，所以要踢完外圍賽先取得參賽資格，佢向來係東南亞弱旅，踢親呢個盃賽都係陪跑，從未試過突破分組賽，老撾敗率高達七成六，柬埔寨仲高達八成八，基本上冇乜競爭能力，絕對係長反最佳對象！
兩大魚腩任人魚肉
老撾世界排名低過同組越南三位，但係兩隊水平其實差好遠，上屆老撾分組賽三戰全敗，入一球失廿三球，畀新加坡狂數十一蛋，越南都淨贏佢九球，反映大軍實力極曳。事實上，佢歷來東南亞錦標賽踢過廿一場，錄得兩勝三和十六負劣績，今次到一分已經偷笑，但相信機會唔大。
另一弱旅柬埔寨亦唔好得幾多，佢世界排名係今次參賽八隊中最低，上屆直頭連決賽周都入唔到，前屆打入決賽周，結果四戰全敗勁失廿二球，仲輸埋畀老撾，真係曳到不得了。大軍史上東南亞錦標賽十六戰輸十四場，顯示佢完全冇料到，今屆睇怕都係會任人魚肉。